ყოველი სეზონის ბოლოს, როცა ტანსაცმელი იცვლება, ჩვენ ვათავსებთ დონაციის ყუთებს საცხოვრებელი კორპუსების სადარბაზოებში. ყუთს თან ახლავს საინფორმაციო წარწერა. მაცხოვრებლები მასში ათავსებენ გასაცემ ტანსაცმელს და სხვა ნივთებს: თეთრეულს, ჭურჭელს, სათამაშოებს, წვრილ საყოფაცხოვრებო ტექნიკას. 4 დღის შემდეგ ყუთი აიღება, ნივთები კი ხარისხდება და გადაეცემა სოციალურად დაუცველ ოჯახებს.
თუ გსურთ, დაგვეხმაროთ დონაციის პროგრამის განხორციელებაში – გახდეთ ჩვენი მოხალისე და თქვენს საცხოვრებელ კორპუსშიც განთავსდეს დონაციის ყუთები, გთხოვთ, შეავსეთ სარეგისტრაციო ფორმა.
მოხალისე ვალდებულებას იღებს ერთჯერადად, 4 დღის განმავლობაში, ყურადღება მიაქციოს ყუთებს, გადავსების შემთხვევაში გაცალოს და დროებით შეინახოს ნივთები უსაფრთხო ადგილას. სხვა დანარჩენზე – ნივთების წაღებაზე, დახარისხებასა და ბენეფიციარებისთვის მიწოდებაზე ჩვენი ორგანიზაცია იზრუნებს.
ამჟამად ნივთები გროვდება თბილისში, დიდუბის რაიონში, ხოლო ბენეფიციარებს მიეწოდება აფრიკის დასახლებასა და ფონიჭალაში. გთხოვთ, შეავსეთ ფორმა მხოლოდ იმ შემთხვევაში, თუ ცხოვრობთ დიდუბის რაიონში.
ჩვენ ზედმიწევნით ვიცნობთ პროგრამის ბენეფიციარების საჭიროებებს, რაც აუცილებელია შეგროვებული ნივთების ოპტიმალურად განაწილებისთვის, ინდივიდუალური და ოჯახური საჭიროებების გათვალისწინებით.
სიგმა - შესაძლებლობებით სავსე ცხოვრებისთვის 